Lojrat Olimpike Pekin 2008

Kur mbeten edhe dy ditë nga ceremo nia e hapjes “Pekin 2008”, shtohen ethet olimpike në radhët e delegacionit kuqezi. Sekretari i përgjithshëm i Komitetit Olimpik Kombëtar Shqiptar, Stavri Bello, do të udhëtojë sot drejt Pekinit së bashku me presidentin e KOKSH-it, Hysen Domi, për të marrë pjesë në ceremoninë e 8 gushtit. Në një intervistë për “Panorama
Sport”, sekretari Bello u shpreh para nisjes se të gjithë sportistët gëzojnë një formë të mirë fizike, vetëm me ndonjë përjashtim të vogël. Sipas Bellos, objektiv i tyre primar në këto lojëra do të jetë thyerja e rekordeve personale. Zoti Bello, vetëm pak orë na ndajnë nga Lojërat Olimpike “Pekin 2008”.

Cila është atmosfera në kampin kuqezi?

Ka pothuajse 10 ditë që delegacioni ynë është sistemuar në fshatin olimpik. Gjatë kësaj periudhe nga informacionet që kemi nga shefi i misionit, të gjithë sportistët janë ambientuar dhe sistemuar me ndryshimin e orarit. Madje, pjesa më e madhe e tyre kanë filluar të stërviten në mënyrë të rregullt, që do të thotë se janë ambientuar me klimën, ushqimin dhe janë përshtatur me kohën dhe oraret e sakta të garave të tyre, me disa përjashtime të vogla, ku mundësi Sahit Prizreni ka pasur një problem me gjurin dhe e ka ngushtuar pak programin stërvitor. Ndërsa qitësja Lindita Kodra ka pasur një problem teknik me armën, por që besoj se në ditët në vijim ka për ta zgjidhur, pasi i kemi dërguar edhe pjesët për ndërrimin e dorezës. Kurse pjesa tjetër e delegacionit, siç e thashë edhe më lart, po vijon normalisht stërvitjen.

Si u përcoll ceremonia e ngritjes së flamurit shqiptar OLGERT SERANI në fshatin olimpik?

Sipas traditës, çdo ekip kur mbërrin në fshatin olimpik zhvillon këtë ceremoni
të mikpritjes dhe ngritjes së flamurit, ku përveç delegacionit shqiptar ishin të ftuar ambasadori shqiptar në Kinë, Maxhun Pepa, si dhe mjaft shqiptarë që jetojnë në Pekin. Sipas informacioneve që kemi nga shefi i misionit, kjo ceremoni festive ka kaluar me shumë sukses dhe të gjithë janë shprehur të kënaqur me kushtet dhe ambientet ku është sistemuar delegacioni shqiptar.

Po rekordmeni Dorian Çollaku u bashkua me përfaqësuesen shqiptare?

Atleti Çollaku ka mbërritur sot me grupin e sportistëve. Në fakt, ai ka kërkuar të jetë në data fikse për arsye të kushteve të punës së tij në Finlandë. Megjithatë koha për Çollakun është e mjaftueshme deri më 15 gusht, kur ai do të konkurrojë, për t’u sistemuar e ambientuar me oraret e stërvitjes në Pekin. Shpresojmë të ambientohet sa më shpejt dhe të ketë rezultate sa më të mira në përfaqësimin e tij në këtë eveniment kaq të rëndësishëm.

Mund të na informoni për formën aktuale që gëzojnë sportistët tanë?

Në përgjithësi, sportistët, pavarësisht problemeve që mund të kenë, pasi mundja
kërkon edhe oponentë për t’u stërvitur sistematikisht nëpër seanca, janë në gjendje optimale. Mendojmë se së pari objektivi i tyre kryesor në këto Lojëra Olimpike do të jetë thyerja e rekordeve personale, pastaj presim edhe ndonjë surprizë. Të gjithë e dimë se sporti është i bukur dhe ofron të tilla
situata të këndshme. Megjithatë, ne do të jemi optimistë për rezultatet e sportistëve tanë.

E para nga “armata” kuqezi që do të garojë në këtë olimpiadë do të jetë kampionia e Evropës, Lindita Kodra. Çfarë parashikoni?

Lindita Kodra merr pjesë në dy gara. Duke qenë edhe kampione Evrope në fuqi, ne shpresojmë shumë që ajo të përsërisë rezultatin e kampionatit evropian të 2006-ës. Do të uronim që të kishte edhe pak fat.

Kush mendohet të jetë favorit tjetër në “Pekin 2008”?

Të gjithë presim nga mundja dhe peshëngritja, që e kanë vërtetuar tashmë që janë sporte elitare dhe kanë dhënë rezultate të nivelit botëror dhe evropian. Kemi shpresa se mund të arrijmë diçka.

ATLETIKË

SPORTISTI: Klodiana Shala
DISIPLINA: 400m
DATA: 16 gusht
ORA: 18:10

SPORTISTI: Dorian Çollaku
DISIPLINA: hedhje çekiçi
DATA: 15 gusht
ORA: 16:40 (grupi A) dhe 18:10 (grupi B)


NOT

SPORTISTI: Rovena Marku
DISIPLINA: 50m stil i lirë
DATA: 15 gusht
ORA: 00:30

SPORTISTI: Sidni Hoxha
DISIPLINA: 50 stil i lirë
DATA: 14 gusht
ORA: 00:30


MUNDJE

SPORTISTI: Sahit Prizreni
DISIPLINA: mundje e lirë(60 kg)
DATA: 19 gusht
ORA: 15:30

SPORTISTI: Elis Guri
DISIPLINA: mundje klasike(96 kg)
DATA: 14 gusht
ORA: 15:30


PESHËNGRITJE

SPORTISTI: Romela Begaj
PESHA: 58 kg
DATA: 11 gusht
ORA: 18:30 (grupi B) dhe 21:30 (grupi A)

SPORTISTI: Gert Trasha
PESHA: 62 kg
DATA: 12 gusht
ORA: 16:00 (grupi B) dhe 01:00 (grupi A)

SPORTISTI: Erkand Qerimaj
PESHA: 77 kg
DATA: 13 gusht
ORA: 16:00 (grupi B) dhe 01:00 (grupi A)


QITJE

SPORTISTI: Lindita Kodra
DISIPLINA: 10m ajër pistoletë
DATA: 9 gusht
ORA: 15:00

SPORTISTI: Lindita Kodra
DISIPLINA: 25 pistoletë sportive
DATA: 12-13 gusht
ORA: 15:00


XHUDO

SPORTISTI: Edmond Topalli
PESHA: 81 kg
DATA: 12 gusht
ORA: 18:00


Oraret e garave të olimpistëve kuqezi janë sipas orës së Shqipërisë...


I uroj suksese ekipin tonë ,,,,, Ishalla marrin ndojë medalje

Edhe une bashkohem me urimin tend Alba suksese ekipit dhe me ndonje medalje

Lindita Kodra, e 40-ta në Olimpiadë


Dëmtimi i armës, një nga faktorët që ka ndikuar në rezultatin e sportistes

Lindita Kodra e ka mbyllur konkurrimin e saj zyrtar në 10 metra pistoletë ajri në Lojërat Olimpike "Pekin 2008" në vendin e 40-të, mes 44 konkurrenteve. Në fakt, qitësja Lindita Kodra dhe trajnerja e saj Diana Mata nuk kanë pasur pretendime të mëdha në disiplinën e 10 metrave me pistoletë ajri. Jo vetëm sepse aktivitetet tona në këtë disiplinë kanë filluar të zhvillohen vetëm dy vjet më parë, por një arsye tjetër sigurisht ka qenë dhe dëmtimi i armës së ajrit gjatë transportit për në Pekin, ku asaj iu thye doreza e armës dhe i humbën vidat që mbanin të lidhur shtjegëzën e shënjestrës.

Pas dërgimin me postë të vidave nga Tirana në Pekin, është bërë e mundur sjellja në gjendjen normale të armës me të cilën ka konkurruar dje qitësja Lindita Kodra. Për të kaluar në garën zyrtare të 10 metrave pistoletë ajri, Lindita Kodra iu nënshtrua më 9 gusht një testi para garës. Testi kaloi me sukses dhe ajo arriti të hynte në garën zyrtare, pavarësisht se nuk mundi të jepte maksimumin e saj, ose të arrinte objektivin që i kishte vënë vetes në këtë garë.

Konkurrimin e ka nisur bashkë me 44 sportistet e tjera në këtë garë, ku Kodra në qitjen e parë ka kapur 92 pikë, në të dytën dhe të tretën 93 pikë dhe në qitjen e fundit 92 pikë. Në total Kodra grumbulloi 370 pikë, duke u klasifikuar në vendin e 40-të. Por duhet thënë se nga vendi i 39-të deri në vendin e 41-të qitëset në total kanë grumbulluar pikë të barabarta, por klasifikimi bëhet në bazë të pikëve të shënuara në gjuajtjen e parë. Objektivi zyrtar që Lindita Kodra kishte në garën e 10 metrave pistoletë ajri ishte arritja në kuotën e 382 pikëve dhe klasifikimi në vendin e 15-20.

Nëse Kodra do kishte arritur kuotën e 382 pikëve, pa dyshim që ky rezultat do ta rendiste në 10-15 vendet e para. Në garën e qitjes me pistoletë ajri në largësinë 10 metra është shënuar edhe një rekord i ri olimpik. Rusja Natalia Paderini, fituese e medaljes së artë, ka thyer rekordin me 391 pikë, nga 390 që ishte rekordi i mëparshëm, i mbajtur po nga rusja Marina Logvinenko.

Medalja e argjendtë në këtë disiplinë shkoi për kinezen Guo Ëenjun me 390 pikë dhe medalja e bronzit për mongolezen Mankzul Tsogbadrah me 387 pikë. Gara e ardhshme e qitëses Lindita Kodra zhvillohet më 13 gusht, në disiplinën e 25 metrave pistoletë sportive në orën 9.00 me orën lokale të Pekinit. Kjo është disiplina ku Lindita Kodra pretendon një rezultat pozitiv në Lojërat Olimpike. Objektivi i deklaruar prej saj në këtë garë është grumbullimi i 580-583 pikëve dhe klasifikimi nga 8-10 vendet e para. Në këtë disiplinë Lindita Kodra mban dhe titullin Kampione e Europës.


Lindita Kodra, mjaft dobët në Pekin

Kampionia e Europës ka arritur rezultatin më të dobët të dy viteve të fundit në Lojërat Olimpike

Shkon në olimpiadë me spaletat e Kampiones së Europës në 25 metra qitje me pistoletë sportive, por qitësja Lindita Kodra ka zhgënjyer. Ajo në garën më të rëndësishme të karrierës së saj si sportiste nuk ka mundur të shkojë më shumë se 570 pikë në total, rezultati më i dobët në fakt, i dy viteve të fundit për të. Lindita Kodra u shpall kampione e Europës në këtë disiplinë me 584 pikë vitin e kaluar në Granda të Spanjës. Ndërsa në Pekin, vetëm 4 muaj para fillimit të Lojërave për Kupën e Botës që ishte aktivitet testues para Lojërave Olimpike "Pekin 2008", Linidta Kodra me 581 pikë u rendit e katërta dhe dy muaj më pas në Mynih ajo shkoi në shifrat e 579 pikëve. Ndërsa në Lojërat Olimpike ndodhi ajo që në fakt nuk pritej, Kodra zbriti akoma më shumë në rezultat, duke shkuar në shifrat e 570 pikëve. Një rënie e rezultateve të qitëses gjatë këtij viti që nuk mund të shpjegohet ndryshe veç me faktin që Lindita është njësportiste shumë emotive dhe në garat ndërkombëtare emcoionet janë një faktor që ndikojnë negativisht në rezultatet e saj. Përsa i përket konkurrimit të djeshëm Lindita Kodra e mbyll me 570 pikë duke mos mundur të shkojë në finalet e olimpiadës. Ajo është klasifikuar në vendin e 35 të mes 41 pjesëmarresve në këtë garë. Në gjuajtet e para të preçizionit Lindita Kodra ka grumbulluar 92 pikë. Pak më mirë është prezantuar në gjuajtet e dyta ku ka grumbulluar 94 pikë dhe akoma më mirë në gjuajtjen e fundit ku ajo ka grumbulluar 97 pikë. Totali i pikëve në gjuajtet e preçizionit ishte 283 pikë. Në garën e shpejtësisë ajo e ka nisur shumë më mirë, por ka përfunduar jo mirë. Gjuajtet e para i ka mbyllur me 98 pikë, në të dytat ka zbritur te 97 pikët dhe tek të fundit 92 pikë, duke grumbulluar në total në këtë garë 287 pikë dhe në fund e ka mbyllur garën me 570 pikë (283+287), një rezultat që nuk e renditi dot atë tek 10 15 më të mirat e kësaj disipline siç dhe kishte pretenduar qitësja Lindita Kodra dhe trajnerja e saj Diana Mata. Kampione olimpike në këtë disiplinë u shpall kimenzja Chen Jing, në vend të dytë me medalje argjendi u rendit Otryn Gundegmaa e Mongolisë dhe në vend të tretë me medalje bronzi gjermniaDorjsuren Munkhbayar.



Edmond Topalli mposhtet për 2 minuta

Xhudoja e cilëson thjesht eksperiencë pjesëmarrjen

Mungesë përvoje e cilëson konkurrimin e sportistit të xhudos shefi i delegacionit, Ylli. Nuk i janë dashur më shumë se 2 minuta kampionit të Europës në fuqi Joao Neto i peshës -81 kg për të mposhtur shqiptarin Topalli. Për të takimi me shqiptarin Topalli ka qenë vetëm një shëtitje. Në fakt, xhudoja nuk ka pasur asnjë pretendim serioz në përfaqësimin e saj në Lojërat Olimpike "Pekin 2008".

Vetë trajneri, njëkohësisht dhe sekretari i Federatës së Xhudos, Labo Capo, e vlerësoi si sukses të sportit që ai drejton thjesht pjesëmarrjen në Lojërat Olimpike. "Për xhudon shqiptare, sukses është thjesht pjesëmarrja në Lojërat Olimpike. Ne si federatë arritëm të merrnin një ftesë nga Federata Botërore për t'u përfaqësuar në një eveniment kaq të rëndësishëm, siç janë Lojërat Olimpike.

Për sa i përket konkurrimit, mund të them se ishim edhe pa fat, pasi që në ndeshjen e parë përballë sportistit tonë modest dhe pa eksperiencën e duhur shorti vuri kampionin në fuqi të Europës, portugezin Joao Neto, i cili ka një karrierë të pasur me suksese. Në Lojërat Olimpike "Athinë 2004" ai u klasifikua në vendin e 7-të, ndërkohë që ky sportist që nga viti 2005 deri në 2008 është fitues i 2 medaljeve të arta dhe 3 medaljeve të argjendta në Kupën e Botës, pa përmendur këtu faktin se në Kampionatin Botëror të këtij viti ai mori medaljen e bronzit.

Ndërkohë, sportisti Edmond Topalli ka një eksperiencë shumë modeste krahasuar me rivalin e tij,"- thotë trajneri Capo. Federata Shqiptare e Xhudos fitoi të drejtën e përfaqësimit për herë të parë në Lojërat Olimpike përmes sistemit të ftesave. Kampion Olimpik në peshën -81 kg u shpall gjermani Ole Bischof, i ndjekur nga koreani Jaebum Kim me medalje argjendi dhe dy të bronztat kanë shkuar për Tiago Camilo të Brazilit dhe Roman Gontuik të Ukrainës.


Erkand Qerimaj,i 13-ti në Olimpiadë

Peshëngritësi shqiptar ka bërë një garë shumë të bukur, duke kapërcyer edhe klasifikimin e baterisë A

Erkand Qerimaj e ka mbyllur me vendin e 13 të konkurrimin në peshën 77 kg. Qerimaj ka dalë i pari në baterinë e tij (B) duke ngritur 154 kg në stilin e shkëputjes dhe 187 në shtytje. Por, për klasifikimin përfundimtar të tij duhej pritur dhe konkurrimi në baterinë A, ku, me rezultatet e tij Erkand Qerimaj është renditur i 11 ti në shkëputje me 154 kg dhe i 13 ti në shtytje me 187 kg, duke ruajtur të njëjtin pozicion edhe në dygarësh.

Përsa i përket konkurrimit të peshëngritësit në baterinë B,shkodrani duket se nuk ka pasur rivalë më të fortë se veten. E ka nisur stilin e parë, atë të shkëputjes me 145 kg në provën e parë dhe e ka realizuar me sukses. Edhe porva e dytë me 150 kg ka qenë e sukseshme për Qerimajn, i cili në garën etretë ka kërkuar 154 kg. Me këtë rezultat Erkand Qerimaj është renditur i pari në shkëputje në baterinë B dhe i 11 ti në klasifikimin e përgjithshëm në këtë stil. Në stilin e shtytjes, peshëngritësi 20 vjeçar niset me pretendimin për të kapur 10 shen e kësaj peshe. E nis shumë mirë me 182 kg në provën e parë dhe vazhdon suksesshëm edhe në provën e dytë me 187 kg. Në provën e tretë ai synon të ngrejë 193 kg. Një rezultat që do ta kishte ngritur akoma më shumë në klasifikimin përfundimtar. Ai arrin ta ngrejë shtangën deri tek gjoksi, por lëkundet tek këmbet dhe shtanga i bie në tokë. Kjo do të thotë se Qerimajvetëm pak përqëndrim do ta kishte kaluar edhe këtë provë.Koha shumë e shkurtër nga prova e dytë tek e treta (pasi, ndërkohë peshëngritësit e tjerë e kishin mbyllur garën) dhe euforia që ndoshta eka kapur në ato momente, kanë bërë që peshëngritësit t'i ketë humbur përqëndrimi. Pavarësisht kësaj, Erkand Qerimaj ka dhënë një rezultat pozitiv në konkurrimin e tij me saktësinë e treguar në të 5 provat e realizuara me sukses dhe me stilin e tij garues. Kampion Olimpik në këtë peshë u shpall peshëngrtiësi i përfaqësues së Koresë Jaehyouk Sa, medalja e argjendtë shkoi për Hongli Li të Kinës dhe e bronzta për Gevorg Davtyan të Armenisë.

Pse prisje naj gje me te mire ti
ne keto lojera